ايه اللى خلانى اتجوز؟

انا بكره جوزى من كل قلبى !

انا حقيقى مش عارفة ابتدى منين بس الراجل ده مخبول فى دماغه, و حقيقى مفيش حاجة توصف احساسى و انا عايشة كل يوم فى الجنان بتاعه ده.

انا فاكرة من سنين كتيرة بعد ما اتجوزنا من شوية قاللى يلا لمى شنطك و حاجتك, احنا مسافرين! ! انا ساعتها كنت فاكرة اننا رايحين نزور ناس قرايبه او طالعين مصيف فى اى حتة عالبحر فبتلقائية سألته مودينا على فين لقيته بيرد رد انا لحد دلوقتى مش فاهماه و قاللى معرفش, انا افتركته بيهزر بس وشه مكنش بيقول كده.

قلتله بطل رخامة بقى, بجد قوللى رايحين فين رد و قاللى بجد معرفش !

انا لحد دلوقتى مستغربة نفسى انى سمعت كلامه بس بصراحة مقدرتش اكسر كلمته, ده مهما كان جوزى يعنى فسيبنا كل عيلتنا و ناسنا بعد ما لمينا حاجاتنا و حرفيا عشنا ايام كتير فى الصحراء.

بعدها بكام سنة و احنا مسافرين رحنا بلد الملك بتاعها كان عامل زى هتلر كده, كان عنده جنون العظمة و يعتبر زعيم العالم فى الوقت ده و كل الناس عاملاله الف حساب, المهم ان جوزى بجد ساعتها كان ارجل واحد فى الدنيا فى عينيا, و طبعا بقول كده و قصدى العكس, انا جوزى قال انى اخته عشان محدش يكلمه بسببى لأن خايف لو قال انى مراته حد ييجى عليه و فعلا ده اللى حصل لحد اول ما ملك البلد شافنى مسك فيا بايديه و اسنانه لأنى كنت جميلة.

انا مش قادرة افهم يعنى ايه جوزى يسيبنى لراجل تانى, هو مش بس سابنى كده, ده ساب مراته تتجوز راجل تانى عشان خايف يفتح بقه و خايف على حياته, انا عاذراه بس هو خايف على نفسه و مش خايف على مراته؟ ياخى ده لو واحد عند ذرة رجولة و حد كلم اخته بيقف يتخانقلها, ما بالك ده واقف بيتفرج على راجل بيتجوز مراته؟

مش بس كده, انا و جوزى مخلفناش, اعترف انه العيب كان منى, انا اللى مبخلفش بس ده قضاء ربنا مقدرش اغيره !

المهم انى قلتله ان احنا كبرنا و مخلفناش و ده ظلم ليك انت تستاهل تجيب عيال فممكن تتجوز و تخلف, انا مش عارفة جبت قلب منين اقوله الكلمتين دول و للأمانة فى ساعتها ندمت لأنه فى ساعتها قال ماشى و كأنه كان مستنى ده يحصل.

انا بجد مش هقدر اوصف كمية الذل انى شايفة جوزى للمرة التانية بيبيعنى بسهولة عشان حاجة هو عايزها و بيحطنى فى مقارنة مع واحدة حرفيا كانت الخدامة بتاعتى, انا كل مرة كنت بشوفها و هى بطنها منفوخة كنت حرفيا ببقى عايزة ادب سكينة فى بطنها, انا حاسة بالذنب انى بقول كده بس انا ده كان السواد اللى هو خلقه جوايا بعمايله.

اخر حاجة ممكن احكيها انه ربنا شفى عقمى و كرمنى بولد جميل بس فاكرة فى يوم الولد ده حكالى حاجة انا كنت بشد فى شعرى بسببها و كنت واصلة لمرحلة انى كنت هجيب السكينة اللى كنت هقتل بيها الخدامة و اغرزها فى ضهر جوزى.

هو ببساطة الولد جالى يوم بليل بيقولى شوفتى ربنا انقذ حياتى انهارده ازاى؟ بابا كان هيدبحنى بس ربنا بعت خروف مكانى عشن يقدمه ذبيحة.

انا مش هضحك عليكم القصص دى مش حقيقية, او بالاصح هى انصاص حقايق و عمر ما انصاص الحقايق كانت حقايق, الكلام ده كله حصل بس فى وسط كل ده كان ربنا موجود و جوزى كان بيعمل غلطات بشعة بس هو انسان فى الاخر و هو بيحبنى و كان بيراعى ربنا فيا.

انا ممكن اقعد اشرح الحقايق بس مظنش انكم محتاجين تسمعوها و صدقونى مش دايما الحقايق بتشفى على قد ما الحب هو اللى بيشفى !

بالمناسبة انا اسمى سارة لو مخدتوش بالكم.