الشهيد محمد شريف "شاورما"
صوت منبه
اه ده معاد الطابور
الدنيا لسه ضلمة و عمال بشبه
هطلع إزاى و انا متأخر كده؟ لأ كده استخبى ورا السور
يا رب مياخدوش بالهم و يكتبونى حضور.
محمد شريف... محمد شريييف !!!
إكتبه يابنى غياب.
إيه يعنى؟ هياخدوا روحى؟
لا يا روحى كده هتحط عالسيخ زى الكباب.
يا عم يعملوا اللى يعملوه و يخبطوا دماغهم فى أكبر باب.
خلى بالك انت كده اللى غلطان.
مخك عطلان... شغل دماغك عليهم ترتاح.
يا عم إفهم، دماغهم قفل و ملهاش مفتاح.
إلحق ياسطى اتكتبت تخلف و ناويين يودوك فى الشلاحات.
هاخد جزا؟ ما فى الآخر ناس بتترمى فى النار و ناس قاعدة فى الملاحات...
و كله بالحب.
بطل تهبد و تبقى مدب...
لسانك هيوديك ورا الشمس.
عايزنى اسكت و أقضيها زيكم همس؟ مش انا.
انت مش وش هنا, خليك ملبس نفسك فى حيط.
صاحبك معاه حق كده هتتربط من بوقك بخيط.
محمد شريف ! لم شنطتك، بكره طالع على سترة.
مش هينفع أطلع أمى تعبانة و مفيش شبكة، بالله عليكم شوفوا حد مكانى.
هو كل واحد أقوله يطلع يفتح فى كانى و مانى؟ لازم تطلع بكره.
يا عم بقولك أمى تعبانة، شوفوا حد غيرى.
كلنا عندنا ظروف بس هو ده الميرى، نفذ الأمر يا عسكرى.
يا فندم...
انا حايش عنك الجزا، كلمة تانى و دوسيهك هيتفتح.
إسمع الكلام بقى عشان الغياب يتمسح، سلم أمرك لله.
يا رب انت عارف اللى جوايا، انا سايب أمى بين إيديك.
انا أه بهزر و أضحك بس حتى لو ده دخل عليهم مش هيدخل عليك.
انا تعبت من كونى مقضيها شبيك لبيك، يا رب عدى الأيام على خير.
يا صاحبى خلاص بقى متقلقش ربنا كبير !
"يلا يا رجالة كله يركب، مش عايز حد واقف عالعربية، الدكر اللى فيكم يعمل كده و بحلف بالله هوقف العربية و أنزله فى وسط الصحرا و ييجى هو مع نفسه"
*كان بيقول كده و إحنا بنركب اللاند كروزر اللى شبه النص نقل*
اتحركنا و العربية طايرة و الهوا بيخبط فينا
دماغنا بتجيبنا و تودينا، إزاى هنقعد من غير شبكة؟
المشكلة مش هنا، المشكلة إن الطريق عمره ما كان ليه ملكة.
صدق اللى قال الطريق مالوش كبير.
الوقت عمال يعدى و مكنتش عارف إن دى هتبقى نهايتى.
الصبح نايم عالسرير و بعد شوية مش هقوم مالسرير.
كنت خايف و قلبى ملهوف على أمى و ده كل اللى شاغلنى، مكنتش عارف إن أمى هى اللى اللى قلبها هيتقطع عليا لما أجيلها و زميلى شايلنى.
انا عارف إنك كان نفسك أجيلك بسرعة بس مش بالشكل ده ولا تكون دى الطريقة.
بس أعمل إيه مش بإيدى، ده اللى ربنا سمح بيه حتى لو هيسبب فى قلبك حريقة.
انا آسف.
عارف إنك مش عايزانى أمشى، ولا انا صدقينى كنت عايز.
يكفينى إن قلبك راضى عنى، كده فايز.
كده كده مش حاسس. الوجع ملحقش يطول جسمى بس يا ريته ما طال قلبك.
معلش سامحينى، أيوه شايف حبك... بس أعمل إيه؟
من غير إزاى و ليه الحادثة حصلت.
هى كده خلصت؟ أكيد لأ، صح؟
كل حاجة بح؟ مين اللى طفى النور؟
انا سامع الصوت بس مش شايف.
خايف، خايف إن كل ده يكون بجد.
سامع مليون حد عمال يقول "شاورما، شاورماااا !!!"
مش عارف أرد.
اتبنى بينى و بينكم حيط سد مش عايز يتهد.
أه لو تعرف انت كسرت قلبنا إزاى لما مشيت.
ياخى يا ريتنى كنت انا اللى مشيت و انت اللى بقيت.
بس عارف؟ بجد مفيش حد شافك و مسبتش معاه علامة.
لولا الملامة فعلا كنت جيت معاك، انا نفسى أبقى هناك.
واقف قدام ربنا زيك زى الملاك، و سايبنا إحنا اللى فى الهلاك.
يا بختك يا عم.
ربنا يرحمك يا شاورما !
Comments
Post a Comment