يسوع الذى أحبه: المقدمة
هبتدى السلسلة دى بسؤال سألته لنفسى, هو ليه الله ميعلنش عن نفسه بوضوح اللى العقل البشرى يقدر يستوعبه و يقول هو ده الله فعلاً؟
بس الإجابة بالنسبالى إنه الله يعلن عن نفسه؟ ده مش حاجة العقل يقدر يقبلها؟ إزاى الله غير المحدود يفهمه الانسان المحدود و عقله محدود؟
لكن من بداية التاريخ الله كان بيعلن نفسه لآدم, و من بعدها لسلسلة طويلة من البشر بشكل شخصى لكن بطريقة يفهمها كل البشر يعنى مثلا من أيام إبراهيم لما راح مصر و حصل اللى حصل مع سارة و الله يعلن بطريقة واضحة إنه إله إبراهيم و سارة مراته و محدش يقربلها فيسيبوه يمشى و يغرقوه خير عشان إلهه ميغضبش عليهم, و لحد ما سارة تموت و ييجى يدفنها و يروح يشترى الأرض اللى هيدفنها فيها فأهل البلد يقولوله إحنا متباركين و غارقانين فى الخير بسببك و بسبب الإله اللى بتعبده.
و من بعدها موسى فى مصر و هو بيخرج الشعب كان الله بيعلن للشعب و للمصريين هو مين, "فَيَعْرِفُ الْمِصْرِيُّونَ أَنِّي أَنَا الرَّبُّ حِينَمَا أَمُدُّ يَدِي عَلَى مِصْرَ وَأُخْرِجُ بَنِي إِسْرَائِيلَ مِنْ بَيْنِهِمْ»."
و المصريين إعترفوا بالله حتى و هما مش بيعبدوه, «نَهْرُبُ مِنْ إِسْرَائِيلَ، لأَنَّ الرَّبَّ يُقَاتِلُ الْمِصْرِيِّينَ عَنْهُمْ»
و من بعد كده الله بيظهر للشعب كله فى مشهد مرعب فى الجبل المتقد بنار لكن كان إيه رد فعل البشر؟
خافوا و بعدوا عن الجبل و قالوا لموسى روح انت اطلع الجبل و قولنا قالك إيه, و فى الوقت و هو فوق عملوا الثور الذهبى و ابتدوا يعبدوه, يعنى الواحد بيسأل الناس دى كان مخها فين بجد بس دى طبيعة البشر, إحنا لحد إنهارده بنرفض الله بسبب خوفنا و عدم منطقيتنا بإختلاف السيناريو لكن النتيجة واحدة إن بنخلق آلهة من خيالنا نعبدها و ننسبلها الفضل و من ضمن الآلهة دى صورنا عن الله.
و كمالة القصة إن يسوع جه للأرض بعد آلاف السنين و أعلن للعالم كله إن هو الله و لكن اليهود رفضوه و قالوا إنه بيجدف و إنه نبى كاذب و قتلوه عشان يقفلوا بقه و يمنعوه يتكلم, لكن هو قام من الموت و قال قبلها لو سكتت الناس الحجارة هتتكلم و تعلنها و حتى بعد ما طلع السما تلاميذه محدش قدر يسكتهم لأن مفيش موت هيمنع الإعلان ده و ده مش إعلان دين جديد و يلا تعالوا إمشوا وراه, كل واحد مات كان عارف هو داخل على إيه و مكانش ده بسبب حرب لكن بسبب حب الله أعلنه للعالم و لحد إنهارده العالم بيرفضه.
الإجابة دى مقدمة لسؤال تانى كنت بتناقش مع ماما فيه -باعتبار إن المسيح هو الله اللى هو حاجة صعبة إن العقل يقبلها- إيه الأصعب؟ إن المسيح يتصلب ولا إن الله ييجى للبشر فى صورة إنسان؟
اتفقنا فى الإجابة تقريباً إن الأصعب على عقولنا هى فكرة إن الله ييجى فى شكل بشرى, حقك تختلف مع الفكرة بس انا مؤمن إن يسوع هو الله الظاهر فى الجسد بناءً على كذا حاجة أقدر ألخصهم فى النبوات اللى اتقالت عنه من قبل ما ييجى للعالم, من كلامه و إعلانه الواضح عن نفسه, من أعماله اللى بتأيد كلامه.
فدى كانت مقدمة عن السلسلة اللى هيكون الfocus فيها عن يسوع نفسه و أقواله و أعماله اللى بتشهد إنه مكانش مجرد إنسان و اللى mainly بتبين مدى جمال الشخص ده.
Comments
Post a Comment